ناس هتفاطع،ناس هتبطل صوتها والاغلبية قررت تدلي بصوتها
وكل واحد له اسبابه الي بتدعوه للاعتقاد بان خياره هو الافضل.
وانا هنا عاوزة افنط الكوتشينه دي واشوف هختار انهي ورقة!
اولا احنا رايحين ننتخب ايه؟
الاجابة:البرلمان(مجلس الشعب) وده دوره اما بيكون تشريعي رقابي في الدول الرئاسية او لتشكيل الحكومة في النظام البرلماني،حيث اننا معندناش دستور نحدد على اساسه وظيفة البرلمان فالمفترض ان يبقى الحال كما هو عليه وبالتالي يكون البرلمان في الدورة القادمة دوره تشريعي رقابي,,حلو كده؟نضيف عليه كمان وظيفة وهي اعداد الدستور
بالتالي الانتخابات هتكون لاختيار مجلس تشريعي/رقابي ولجنة تأسيسية
لحد هنا وحلو الكلام
بس ممدوح شاهين قال في اخر حوار له ان المجلس لا يمتلك سحب الثقة من الحكومة (الدور الرقابي) والكلام ده ممكن نلاقيه هنا: http://shorouknews.com/news/view.aspx?cdate=27112011&id=3036f908-652d-4b9d-8c37-237a355bced5
من (تشريع،رقابة،دستور) ل (تشريع،دستور) وكده يتبقى معانا حاجتين
رضا هو احنا هننهب !
لكن في المؤتمر الصحفي اللي طنطاوي عمله قال ان وضع القوات المسلحة سيبقى كما كان في الدستور السابق حتى بعد الدستور الجديد والكلام ده ممكن نشوفه بالتفصيل
هنا: http://www.al-akhbar.com/node/26577
يبقى كده ننقص وظيفة كمان من وظايف المجلس اللي هي وضع الدستور بعد تقييده بشكل واضح وصريح تماما
"يتبقى عندنا وظيفة واحدة الا وهي "التشريع
الوظيفة دي بقى يختص بيها المجلس حسب الاعلان الدستوري لحين ايجاد السلطات المنتخبة "والمفروض" انها مجلس الشعب بس طبعا مع المجلس (المفرود عند المكوجي)
طيب قررنا اننا هننزل ننتخب المجلس اللي ملوش اي تلاتين لزمة علشان جاي على شوقة بأه ونفسنا فيه والكلام ده ،مش المفروض نكون ضامنين نزاهته؟
النزاهة دي تيجي من خلال:
اشراف قضائي 1
تأمين للانتخابات 2
وشفافية في الفرز وتأمين الصناديق 3
وعدم التأثير على الناخبين بتوجيههم لجهة معينة 4
الاشراف القضائي:موجود نوعا ما 1
تأمين الانتخابات:هتأمنها الداخلية البلطجية وهتعاونها قواتنا المسلحة اللي حمت ام الثورة 2
شفافية الفرز وتأمين الصناديق: طبعا دي متأمنة 100% وخصوصا انها هتبات متدفية في حضن الداخلية البلطجية 3 بكل شرف
عدم التأثير: من كتر حرص القوات المسلحة على راحتنا فهما عملوها في يومين، وكل مرشحين وشطارتهم بقى 4 في الاشاعات ، في اليوم الاول كل واحد وحلاوته في اقناع الناس ان هو اللي خد الاغلبية وطبعا معروف عننا الفهلوة واننا نفهمها وهي طايرة حتى لو كانت متشمعة بالشمع الاحمر وفي حضن البلطجية يووه اقصد الداخلية!
يبقى احنا رايحين ننتخب مجلس بلا صلاحيات اللهم الا ما يتعطف بيه ابائنا اللي في المجلس
ورايحين ننتخب في انتخابات غير ضامنين نزاهتها
في مقابل هذا "العرس" الديمقراطي الباهر ناس دفعت روحها تمن وناس قدمت عيونها مهر واللي لم نقطة "العرس" هما الاحزاب والنخب
في ناس بردو في الاخر هتقول اروح اختار الصوت اللي شايف انه يمثلني في المعارضة اقله الاقي حد يعترض بصوت عالي !
ماشي بس ده لو ضامنين نزاهة الانتخابات والاهم لو عندنا معارضة "حقيقة" نثق فيها ونثق في عدم خستها ودنائتها وعلى حد ذاكرتي الضعيفة فاكرة ان كل المعارضة _عدا الوسط_ هرولت للقاء عنان و مضت على وثيقة الندامة وسلمتهم مفتاح الكرار!
وفي ناس هتقول نبطل صوتنا بدل ما يتزور!
وده طبعا على اساس ان الداخلية هتغطي الصناديق بالليل كويس علشان متبردش وهتسهر على راحة اصواتنا لحسن تبرد لا سمح الله!
اقاطع يعني!
كل واحد عقله في راسه يعرف خلاصه
في الختام نحمد الله على نعمة المرحلة التالتة
